سابق وزیراعظم کی مشیر خزانہ کو انفرادی انکم ٹیکس میں فوری کمی کی ہدایت

سابق وزیراعظم نے مشیر خزانہ کو ایک لاکھ روپے ماہانہ آمدن والے افراد سے کسی قسم کا انکم ٹیکس نہ لینے کی ہدایت کی ہے۔
تفصیلات کے مطابق سابق وزیراعظم نوازشریف سے مشیر خزانہ مفتاح اسماعیل نے رائے ونڈ میں ملاقات کی جس میں سابق وزیراعظم نے مشیر خزانہ کو چند اہم ہدایات دیں۔
نوازشریف نے مشیر خزانہ کو ہدایت دی کہ انفرادی انکم ٹیکس میں فوری کمی لائی جائے اور اس کی شرح پندرہ فیصد سے زیادہ نہیں ہونی چاہیے جب کہ ایک لاکھ روپے تک ماہانہ آمدن پر کوئی انکم ٹیکس نہ لیا جائے۔
سابق وزیراعظم نے مفتاح اسماعیل کو مزید ہدایت دی کہ پندرہ فروری دوہزار اٹھارہ تک ایکسپورٹرز کے سیلز ٹیکس سو فیصد ری فنڈ کیے جائیں،کیونکہ گیس کے نرخوں اور جی آئی ڈی سی سے صنعتکار بہت پریشان ہیں، ان میں فوری کمی لائے تاکہ پاکستانی صنعت کار جنوبی ایشیا کے صنعتکاروں سے مقابلہ کرسکیں۔